മലയാളിയുടെ മനസ്സിൽ സ്നേഹത്തിന്റെ പച്ചപ്പും സാഹോദര്യത്തിന്റെ നറുമണവും നിറയ്ക്കുന്ന തിരുവോണനാൾ വന്നെത്തി. അത്തം ഒന്നിന് തുടങ്ങുന്ന ഒരുക്കങ്ങളും കാത്തിരിപ്പും സഫലമാകുന്ന സുദിനം. ഓരോ മലയാളിക്കും ഓണനാളുകൾ, പ്രത്യേകിച്ച് തിരുവോണദിനം കാത്തിരിപ്പുകളുടെ, സാഫല്യത്തിന്റെ ദിനമാണ്. ബന്ധുമിത്രാദികൾ ഒരുമിച്ചുകൂടി പഴയ ഓർമകളും സ്നേഹബന്ധങ്ങളും പുതുക്കുന്ന സുന്ദര ദിനം. സ്വിസ്സിന്റെ പല ഭാഗങ്ങളിൽ ജീവിക്കുന്ന നമ്മൾ ഒരുമിച്ചു പൂക്കളം തീർത്തും, സദ്യയുണ്ടും, കുശലം പറഞ്ഞും, കലാപരിപാടികൾ ആസ്വദിച്ചും അടുത്ത ഓണനാൾ വരുന്നതുവരെ ഓർത്തുവെക്കാനുള്ള അനശ്വര മുഹൂർത്തങ്ങൾ തീർക്കുന്ന സുന്ദരദിനം.

സ്വിസ് മലയാളികൾക്ക് എന്നും പുതുമയുള്ള ഓണാഘോഷങ്ങൾ അവതരിപ്പിച്ചിട്ടുള്ള ബിഫ്രണ്ട്സ് ഈ വർഷം നിങ്ങൾക്കായി സമർപ്പിക്കുന്നു “ബി ഫ്രണ്ട്സ് ഓണപ്പൂത്താലം 2018, പ്രശസ്ത പിന്നണി ഗായകരായ സിദ്ധാർത്ഥമേനോൻ, ലക്ഷ്മി ജയൻ, പ്രസീത എന്നിവരോടൊപ്പം മനോജ് പെരുമ്പിലാവും ചേർന്നൊരുക്കുന്ന സംഗീത സദ്യ, നൃത്തത്തിന്റെ വിസ്മയക്കാഴ്ചകൾ തീർക്കാൻ നൂറ്റി മുപ്പതിലധികം കലാപ്രതിഭകളെ അണിനിരത്തി സൂര്യ 6 ശില്പ തളിയത്തിന്റെ നേതൃത്വത്തിൽ നിറങ്ങൾ ചാർത്തുന്ന നൃത്തവിരുന്ന്, വിഭവ സമൃദ്ധമായ ഓണസദ്യ തുടങ്ങിയവ ഇത്തവണത്തെ ആകർഷണങ്ങളാണ്.